TANKARIA WEATHER
બે દિવસથી સવારે ઠંડીનો ચમકારો વર્તાઈ રહ્યો છે. શિયાળાની ઋતુ બિલ્લી પગે ભરૂચ જિલ્લામાં પ્રવેશી રહી છે. ફજરમાં ઠંડી વર્તાઈ રહી છે. આવા આહલાદક વાતાવરણની મજા ટંકારીયાના નગરજનો માણી રહ્યા છે. ગમતીલી ટાઢ મહેસુસ કરાવે છે. સવારનો તડકો પણ ધીમે ધીમે કૂણો થઇ જવા પામ્યો છે. જાણે સૂરજદાદા પણ હવે થોડો આળસુ બની યાત્રા મોડી શરુ કરી વહેલી નિપટાવી વહેલો પોઢી જાય છે [મતલબ કે ફજરની નમાજનો સમય થોડો લંબાયો છે અને ઇશાનો સમય ટૂંકો થયો છે]. મળસ્કે ગ્રામ્યજીવન માણવા જેવું હોય છે. સૂર્ય કિરણઆચ્છાદિત ચમકતી પાણીંબુન્દ છોળો ઝાકળ રૂપે અવકાશને બાથોડીયે ભરી જાણે શિયાળો આલબેલ પોકારે છે. કોરોના કાળને લઈને છેલ્લા બે વર્ષથી એન. આર. આઈ. ભાઈ બહેનો માદરે વતન આવી શક્યા ના હતા. પરંતુ હવે પરિસ્થિતિ સામાન્ય થઇ જતા એન. આર. આઈ. ભાઈ બહેનો માદરે વતન આવવા થનગની રહ્યા હશે. અમુક બિરાદરોએ તો તેમની હવાઈ ટિકિટો પણ તૈયાર કરી લીધી હશે.
તો આવો – પધારો અમારે દેશ.
.