જે-તે સમયે ટંકારીઆ કન્યાશાળા પાસે પોતાનું મકાન ન હતું ત્યારે  કન્યા કેળવણીના મહત્વને ખાસ ધ્યાનમાં રાખી, ભાડું લીધા વગર વિનામૂલ્યે કન્યાશાળા એમના મકાનમાં ઘણા વર્ષો સુધી કાર્યરત હતી એ પણ એમની મહાન ખિદમતોમાંની એક અણમોલ ખિદમત હતી. તેઓ ગરીબ લોકોને, વિદ્યાર્થીઓને અને દર્દીઓને હંમેશા મદદ કરતા હતા. મરહૂમ ઈસ્માઇલભાઈનું અને એમના હીરા કુટુંબનું ખાસ કરીને ટંકારીઆ ગામના બાળકોના શિક્ષણને લગતા કામોમાં દાયકાઓથી મોટું યોગદાન રહ્યું છે. પોતાના વ્યસ્ત જીવનમાંથી સમય ફાળવી ટંકારીઆમાં થતા કેટલાક ખાસ કાર્યક્રમોમાં હાજરી આપવા તેઓ મુંબઈથી ટંકારીઆ આવતા હતા. આમ માતૃભૂમિ સાથે જીવનપર્યંત જોડાયેલા રહ્યા હતા.

મુંબઈમાં સ્થાયી થયેલા મૂળ ટંકારીઆ ગામના જનાબ હાજી ઈસ્માઈલભાઈ હીરાવાલાની અમૂલ્ય સેવાઓ ફક્ત ટંકારીઆ ગામ પૂરતી જ સીમિત ન રહેતાંં સમગ્ર ભરૂચી વહોરા પટેલ સમાજ સુધી વિસ્તરી હતી. ઘી બોમ્બે પટેલ વેલ્ફેર સોસાયટી સંસ્થાના અત્યંત સક્રિય ટ્રસ્ટી/હોદ્દેદાર તરીકે તથા દાનવીર તરીકે એમનું ખૂબ અગત્યનું યોગદાન રહ્યું છે. રમઝાન માસમાં મુંબઈના પટેલ મુસાફરખાનામાં રોકાતા લોકો માટે સેહરી તથા ઇફ્તારી માટેનું આયોજન વર્ષો સુધી જનાબ ઈસ્માઇલભાઈ તરફથી કરવામાં આવતું હતું. મુંબઈના પટેલ મુસાફરખાનામાં જરૂરી ફર્નીચરનું પોતાના તરફથી દાન કરવા જેવા ઘણા સરાહનીય કામો તેમણે આ સંસ્થાના હોદ્દેદાર તરીકે કરીને એક ઉમદા મિસાલ કાયમ કરી છે. તેઓ ઘી બોમ્બે પટેલ વેલ્ફેર સોસાયટી ભરૂચ (સ્થાનિક)ના ચેરમેન અને ટ્રસ્ટી પણ હતા. તદુપરાંત જરૂરતમંદ લોકોને આર્થિક સહાય અને વગર વ્યાજની લોન આપવાનું સરાહનીય કામ કરતી ‘પટેલ અર્બન સોસાયટી’ ના ટ્રેઝરર તરીકે પણ તેમનું મહત્વનું યોગદાન રહ્યું છે. વેલ્ફેર હોસ્પિટલ ભરૂચને આપેલ એમની અમૂલ્ય સેવાઓ પણ હંમેશાં યાદ રહેશે.

ટંકારીઆ: ઈતિહાસની રોશની પુસ્તકમાં એમના સવાબે જારીયહના ઘણા કામો સુવર્ણ અક્ષરે કોતરાયેલા છે. એમના પરોપકારી જીવનમાં એમણે કરેલા સેવાના અનેક કામો આજની અને આવનારી પેઢીઓ માટે દિશાસૂચનનું કામ કરશે અને એમણે કંડારેલા માર્ગે ચાલવાનું માર્ગદર્શન આપણને મળતું રહેશે.

અલ્લાહ રબ્બુલ ઇઝઝત એની ખાસ રેહમતથી આવા નેકદિલ ઈન્સાનની નાની મોટી તમામ ભૂલોને માફ કરી એમની નિ:સ્વાર્થ ખિદમતોનો બેહતરીન બદલો આપી જન્નતમાં આલા મુકામ અતા ફરમાવે. આમીન.

“ઉરતે જો ફિઝાઓં મેં થે શાહીન ન રહે
બાઝૌક ન રહે ઝહીન ન રહે
                              – અલ્લામા ઇકબાલ